糯米雀與糯米火雞

虎年首祝大家身體健康，萬事如意！春節酒樓食店基本都火爆，往飲茶都要訂座，有食肆中午要分時段入座，疫情下實屬可喜現象。

茶敘中大家聊及酒樓於七、八十年代，為提升競爭力，將部分點心的份量加大。

當年糯米雞曾是一隻（指一籠，下同），有食肆改為較細小兩隻，口痕友即笑謂變咗糯米雀，但反應良好流傳至今。日前見有食店反潮流推一隻的大糯米雞，其份量比以前還要大，未知是否叫糯米火雞？

雞球大包，叫得做大包當然係一個；亦有形容雞包仔咁細，所以規格是三個。大家喜愛的叉燒包，原是兩個，後增為三個；山竹蒸牛肉球、時菜鯪魚球，亦是由兩粒改為三粒。當初三粒份量是較細，但隨後增加至以前兩粒的斤両。布拉腸粉因有蒸腸粉罉尺寸規範，所以不能增加。

以往飲茶是指飲早茶，有長者早上約六點鐘，已去茶樓一盅兩件再加二両雙蒸；或有稍晏約八、九點。但現今居民生活節奏推遲，假期差不多約十一點才去飲茶，可算是早餐加午餐一併享用。

昔日去酒樓飲茶，樓面多會先奉上白色毛巾仔，冬天更會暖熱後才奉客；如有相熟樓面，都會給予免茶優惠。茶樓對茶葉都非常注重，因為是主要收入來源，所以沒有免茶。近年見有食肆採用方便的茶包；好茶者亦喜自攜靚茶葉茗茶。

現在去酒樓飲茶，環境多是較休閒，享用亦較需時，故多是公商務或有閒階級。茶樓已鮮見，但仍不乏愛好飲茶者，從一些美食茶室經常滿座可見，只是消費較為大眾化。

普洱茶