試食全日早餐

飯腳友時時話慳得一文得一文，但又喜歡食好嘢，於是佢常常到處覓食，看看有甚麼好食兼抵食的地方，然後就拉上幾個朋友一起去食。最近佢頻頻提議我們去永利Cafe Encore（咖啡庭）食全日早餐，於是聽佢講去一次試試，點知摸門釘！原來每逢星期一二三只開早上七點到十一時，其他日子才會到晚上十時（不過聽說今個月中會改為每天都開到十時）。

去到食唔到唔忿氣，結果另擇吉日再去一次，終於食到朋友推介的全日早餐！

首先講一下餐牌，打開才發現選擇非常之多。例如有魚片魚蛋麵、星洲炒米、三文治等，都屬於一般茶餐廳提供的食物，大概只是賣幾十元；以酒店的招呼及格局，性價比可以算是非常之便宜。

其實並非一定要食全日早餐，其他單點亦非常多及吸引。不過，既然係朋友隆重介紹，總要試一個全日早餐，於是選了圖一這個餐。原因係我個人不太喜歡醃肉，呢個餐有兩片澳洲牛肉，比較啱我食；仲有我喜歡的太陽蛋、一杯港式奶茶，一碗五香肉丁通粉算是Bonus，幾乎食唔晒，合共九十八元，真係好抵。

因為一個餐夠兩個人食，於是另外叫了一份安格斯牛河（圖二），亦係九十八元。既然講明安格斯牛肉，肉質嫩滑，事實係比一般茶餐廳用料上乘。由於我只是一個平民食客，雖然唔識得計算食物成本，但也會知道食落肚的食物是甚麼質素，呢個感受最真實。

其實餐牌中有很多其它簡單選擇，例如各種自選粉麵、即食麵、通粉、米粉、米線都有，可以配各式食物，並可選擇不同烹煮方式（如炒或湯），價錢由六十八元至九十八元不等！

雖然到呢個地方食飯有很多選擇，但只適宜純食飯而不是食飯加聊天吹水，因為免費泊車只是兩小時，很容易過時，就會覺得唔抵。事關很多酒店最少免費泊車三小時或以上。另外，出入停車場的通道比較狹窄，發現牆上留有不少刮花的痕跡，估計不少汽車曾中招，駕車人士請特別小心。

明 潮