中秋節聚天倫樂融融

中秋節將至，以往的月餅廣告“行船爭解纜，月餅我賣先！”搶閘提前推出。但今年在疫情下，廣告似甩咗纜。

上世紀中居民買月餅，流行供“月餅會”。餅店多會贈送豬籠餅，較高檔的贈送玻璃小禮盒豬仔餅。有錢居民購買五花八門的公仔燈籠；普羅大眾的小孩，或自製柚皮燈籠賀節。

月餅以蓮蓉餡至為正宗，但有食家喜五仁月餅，貪其口感層次豐富，且不太甜。現今月餅五花八門，像流沙奶皇月餅、冰皮月餅、雪糕月餅等層出不窮。

每年月餅是餅店最大宗業務。昔日兩大餅家──英記及顯記為宣傳月餅，都會搭建不同主題的彩燈牌樓。其後各餅家爭相彷效，令每年睇牌樓，變成中秋節居民的免費娛樂。至七十年代中打後，時代轉變牌樓被淘汰。

已被居民遺忘多年，年輕人甚至未聽聞過的“日光節”（農曆八月十九日），昔日有拜日光的習俗，祭品有“日光餅”等。有說是將中秋節賣剩的月餅，改製成“日光餅”出售。

中秋節秋高合郊遊，以往居民晚上多前往西、南灣及黑沙海灘等地，帶齊月餅、芋頭、菱角、碌柚等水果食品，闔家團圓共賞月。現交通更方便，中秋節往郊外賞月習俗，流傳至今更加盛行。

中秋節親人齊聚，賀節飯局菜式豐富。餐後泡壺普洱、嘗件月餅一樂也。不過營養師已強調，月餅少食多滋味，否則中秋節過後，自己的肚腩，可能比中秋月光更加圓！

普洱茶