椰子粟米紅蘿蔔素湯

最近在超市見到印度椰子減價，想起秋風起，用椰子煲湯滋潤秋燥一流，除了給自己買了兩個椰子回家外，也着女兒用椰子煲啖湯水喝。

“吓？椰子煲湯？劈開咪漏曬啲水囉，仲有啲毛點搣？”她說的其實是另一種椰子，叫毛椰子。“印度椰子無毛，如果你劈開有水的話就飲咗佢啦，出面買個椰青都要幾十蚊。”我打趣說道。“你講的那種椰子，也可以煲湯燉糖水，或者第時你過大禮時也合用。不過超市就買唔到了，要去椰子專賣店。”

印度椰子其實是椰皇，已經拋光去毛；為了存放更久，在原產地時經已把水分曬乾，裡面的椰汁曬乾後，黏附在椰肉身上成為精華。如果真的發現裡面有水，可能係曬得不夠乾，很大機會已經發霉，切勿飲用。

說罷，回到家中隨手執些合宜的煲湯材料，想起前些日子天氣較熱，於是選了粟米和紅蘿蔔配佐，袪水降燥；此湯亦可以加南瓜，能健脾，也令味道更加清甜。至於藥材方面，挑了淮山、栗子、南北杏、腰果，滋陰潤肺；再加多一條北蓍，除了秋冬適宜補肺外，還有“畀個女激到無氣”，要補一下氣。

做法

1. 清洗椰子表皮，用菜刀慢慢劈開。

2. 帶衣栗子需用熱水浸泡然後去皮，不帶衣的洗淨即可。

3. 淮山、紅蘿蔔、粟米去皮切段。

4. 南北杏及北蓍以熱水浸泡三十秒去硫磺，再以清水沖洗。

5. 把所有湯料放入兩升水中，中火滾起轉慢火煲一個半鐘即成。

材料

印度椰子一個

紅蘿蔔一條

粟米 一條

淮山 一條

粟子 十粒

南北杏適量

腰果 適量

北蓍 一條

陳皮 一瓣

水 兩升

廚房小公主