大閘蟹當造咪錯過

首次同大家見面，老套啲都要講句：最緊要祝各位身體健康，疫情快過，社會繼續安定繁榮，飲食業重新興旺。冲返壺陳年普洱茶，同大家講古論今，濠飲濠食！

正值秋冬，雖然不建議食用野味，但想起當年一張簡簡單單的菜單：清蒸大閘蟹、太史五蛇羹、菊花鱸魚球、古法炆水魚、枝竹羊腩煲、蝦子冬筍扒豆苗，原煲臘味飯，已令人垂涎。

大閘蟹現正膏滿蟹肥的時候，九圓十尖，但食家多揀蟹公品嘗，因其膏夠香滑，蟹乸的膏則較硬及覺飽滯。等於食家取厴仔蟹而捨膏蟹享用。

近年澳門經濟較為富裕，市民食大閘蟹亦相當普及平常。相信大家都知道蒸大閘蟹用紫蘇葉，食用時配陳醋及薑茶。有食得招積者用“蟹八件”（腰圓錘、小方桌、鑷子、長柄斧、調羹、長柄叉、刮片、針），食完將蟹殼拼回一隻蟹的形狀。但現今社會生活節拍緊迫，食蟹多簡單用三件工具：蟹剪、蟹針、蟹勺。

食大閘蟹配花雕酒亦為不二之選。一般食肆如果人客飲花雕，侍應生都會詢問人客要否暖熱，及奉上話梅，更有個別人客要求加檸檬。花雕品牌繁多，檔次亦有高低。一般普通花雕，配話梅或檸檬品嘗，問題都不大，但如果一枝靚陳年花雕，加入話梅飲，食家西門公子話：戇居！

普洱茶