冬瓜陳皮老鴨湯

啱啱上個周末過咗處暑。以前成日聽人講處暑寒來，暑氣至此而止矣，預示炎熱嘅夏天即將過去。但我哋身處嘅南方邊度有咁快到秋天，日日都仲係三十幾度，諗多啲計仔消暑就差唔多。

老周我最鍾意叫人飲湯水消暑，今期就同大家分享一個我哋廣東傳統嘅消暑湯水——冬瓜陳皮老鴨湯，不但清潤解暑，利水祛濕，仲有健脾開胃嘅功用，最適合宜家呢啲熱辣辣嘅天氣飲用。材料一啲都唔複雜，名副其實嘅簡單又有益，相信好快就會成為你哋嘅家常湯水。不過提提大家，鴨肉性寒，體質虚寒、胃部冷痛或容易腹瀉嘅朋友就不宜多飲啦。

材料有：老鴨一隻約一斤半、瘦肉四両、陳皮一塊、生同熟薏米共一両、薑數片、冬瓜一斤。做法：將隻鴨開邊洗淨，用鑊爆一下；冬瓜連皮切大角形，陳皮則用水泡開，備用。將四至六人份量嘅水煲滾，放入鴨、瘦肉、薏米、陳皮同薑，煲約一個鐘後先放埋冬瓜入去，煲多半個鐘，落鹽調味即可。

周 中

（澳門美高梅金殿堂烹飪顧問）