薑芽桂花雞

時值初夏，又到咗子薑當造之時。子薑即係薑芽，一年只有一次造期，細嫩少根，口感爽脆，辛辣味比老薑輕得多。我哋老一輩每年一到五、六月就鍾意醃子薑，清爽酸甜，醃定擺喺雪櫃做餐前小食，或者攞嚟煮餸都好滋味。提提大家，揀子薑要揀夠白身、皮滑肉厚嘅，仲要表皮無穿無爛，咁就代表夠晒新鮮，同埋最緊要係夠嫩身。

用無醃過嘅新鮮子薑煮餸亦十分適合夏天食用。老周我今期同大家分享個夏令啱食嘅雞肉菜式，甜甜地又清爽，一掃悶熱難受嘅感覺。

材料：光雞一隻，薑芽四両、冬菇八隻、蒜茸少許、桂花醬少許、葱度少許、鹽一茶匙、上湯一碗、生粉一茶匙半、酒半湯匙、蠔油一湯匙。做法：先將冬菇浸發好，備用；薑去皮切角形，落水滾約五分鐘後備用。將雞肉清淨切件，略略沾上生粉後落油爆炒，之後逐一加入上湯、薑、冬菇、桂花醬、酒、鹽同蠔油，冚好蓋後煮約八分鐘，最後落生粉水打個芡，搞掂。

周 中 （澳門美高梅金殿堂烹飪顧問）