雙花雪梨湯

最近新冠肺炎疫情席捲全球，港澳地區當然都大受影響，我哋辦公室平時最多節目嘅一班靚女同事都異口同聲話呢排放工都唔敢周街去，寧願食外賣或者自己煮，費事出去食飯有風險咁話。老周我就覺得，可以平平安安留喺屋企，煮吓飯仔，同時食得清啲、健康啲，都未嘗唔係一件好事。

初春呢排乍暖還寒，天氣潮濕，搞到個人周身唔聚財，濕度高亦容易令人昏昏欲睡，影響胃口。今期我就同大家分享一個十分適合春天飲用嘅湯水――雙花雪梨湯，可清熱解毒，潤肺止咳，仲有潤膚養顏嘅功效，啱晒各位靚女；加上味道清甜，實得屋企人嘅歡心。材料有：瘦肉半斤、雪梨四個、金銀花、白菊花、南北杏、蜜棗五粒、陳皮一片。將豬肉先汆水洗淨，備用；雪梨去皮同切塊，金銀花、白菊花、南北杏、蜜棗同陳皮稍為浸軟，再洗淨。所有處理好嘅材料放入煲加水，用中火煲約一個半鐘，飲用前加鹽調味即可。

周 中 （澳門美高梅金殿堂烹飪顧問）