春分田螺

嚟緊禮拜五就係春分，係中國人農曆廿四節氣之一，代表大地正式回春。以前廣東農村人喺春分當日或前後，家家戶戶都會煮田螺，因為廣東淡水河中嘅新螺正值當造繁殖旺季，肉質爽彈肥美，係春分時節廣受民間喜愛嘅食材。

眾所皆知，田螺買返嚟係唔可以即刻煮，皆因殼裡面有唔少泥沙，要處理乾淨先可以食。處理方法要先用清水浸田螺一晚，可滴幾滴菜油有助佢地快啲吐沙，清埋其他污糟嘢出嚟。浸完之後再逐隻沖水洗淨，將田螺尾部鉗走，瀝乾水份就可準備煮食。

今次老周我就同大家分享一個簡單嘅田螺煮法，材料十分簡單：適量嘅薑茸、葱段、豆豉茸同紫蘇葉落油鑊炒，鍾意食辣嘅朋友可自行加少少切粒辣椒；炒香後放田螺落鑊一齊炒，落些少鹽、糖同生抽調味，最後加入清水淹過田螺，煮到水滾就可以上碟。煮田螺趁熱食就最冶味，佐酒亦一流，大家今個星期不妨試煮吓，應一應節。

周 中 （澳門美高梅金殿堂烹飪顧問）