白蘿蔔煲柴魚

蘿蔔主要分青、紅、白三種。紅蘿蔔在西餐比較常用到；青蘿蔔係內地唔少人都鍾意攞嚟生食，冬季嘅香脆甜美，十分好吃，而且聽聞食生青蘿蔔可治感冒，好多時喺路邊攤檔都會見到生青蘿蔔嘅蹤影；至於白蘿蔔，我地廣東人就最鍾意用嚟炆肉，容易吸收肉汁，食落零舍冶味。

雖則三種蘿蔔都係煲湯常用嘅材料，但老周我今次就唔係教大家煲湯，而係一味簡單又健康嘅家常菜——白蘿蔔煲柴魚。味道雖然比較清淡，但咁先可以品嘗到白蘿蔔本身嘅清甜滋味，實在唔錯。不過提一提大家，白蘿蔔為寒涼蔬菜，陰盛偏寒體質、脾胃虛寒嘅朋友就不宜多食啦。

材料有：白蘿蔔一斤、柴魚半斤、薑四両。做法：先將白蘿蔔去皮，切角形備用；柴魚喺火爐輕輕燒一燒，洗淨薑切片。將白蘿蔔同柴魚一齊放入煲內，加埋薑同適量清水，慢火煲約一個鐘，最後放少許鹽調味。老周我最鍾意蘸少少辣椒醬食，十分之美味；清湯亦可以飲埋，咁就可以當“一餸兩味”。

周 中（澳門美高梅金殿堂烹飪顧問）