鮑魚其實好易煮

唔知大家認為有咩餸係過年必備菜式呢？老周我就二話不說揀咗盆菜。事關廣東人就最鍾意喺大時大節嘅時候，尤其係農曆新年，約埋親戚朋友圍桌歡聚，盆菜內嘅食材各有吉祥嘅意思，寓意合家團圓，食完賺到“盆滿缽滿”。盆菜唔少得嘅食材包括寓意“發財、好市”嘅髮菜及蠔豉，意頭好又簡單易煮，另外仲有成日畀人問我點落手處理嘅鮑魚同花膠。

之前教咗大家花膠嘅處理方法，今日就講下點煮鮑魚啦。相信有好多人都鍾意去旅行嘅時候買入乾鮑，好似日本、澳洲或南非咁，但返嚟又唔知點煮。其實煮嘅時間長短在乎鮑魚嘅產地及質地，例如南非鮑魚嘅烹煮時間就比日本同澳洲鮑魚長。

首先將準備好嘅乾鮑用清水浸泡兩日，切記每日換水；然後用合共一斤嘅雞骨排及火腿去煲煮一斤嘅鮑魚，用慢火煮一整日後，攞出嚟用手撳一撳，如果鮑魚已經夠腍身就可以攞出嚟備用。煮好嘅鮑魚可以用嚟煮鮑魚汁，或直接加蠔油、生抽等打芡上碟食用。

周 中 （澳門美高梅金殿堂烹飪顧問）