滋補哈密瓜

秋天風高物燥，總比春夏天嘅潮濕悶熱舒服得多，但天氣乾燥隨之而來嘅身體問題都唔少。坐喺寫字樓嘅大家就最易感受到皮膚乾燥，呢樣乃係致老嘅頭號殺手，因為乾紋好易變皺紋，到時就恨錯難返！

除咗搽貴價護膚品，飲湯水都不失為一個天然嘅補濕好辦法。呢排寫字樓嘅一眾靚女同事不停問我有咩滋補湯水推介，所以呢期我就想教大家煲返味清潤補濕嘅“哈密瓜鵪鶉湯”。甘甜嘅哈密瓜被譽為“瓜中之王”，營養價值高，有豐富嘅鐵元素，可補氣血，滋補效果非常好，對女性尤其有益，唔攞嚟煲湯都可以多食哈密瓜。不過提醒大家，哈密瓜性涼，虛寒體質嘅朋友要注意；而且哈密瓜糖份都幾高，糖尿病人都唔適宜多食。

湯水嘅材料有：哈密瓜半個（約磅半），鵪鶉一隻，瘦肉四両，南北杏少許，薑兩片。做法：先將哈密瓜去皮，切角形：鵪鶉開邊，同瘦肉一齊汆水，之後放入半煲水，加埋南北杏同薑一齊煲約一個半鐘，再落埋哈密瓜，煲多約半個鐘就可以。飲嘅時候可適當地加返少少鹽調味。

（澳門美高梅金殿堂烹飪顧問）

周 中