女團XiX七月首開戶外騷

四人女子組合XiX宣佈將於七月十八日，假西九文化區Backyard@AXA WONDERLAND首次舉行個唱《XiX微笑擊敗全世界》！

為籌備這次演唱會，眾成員表現得非常興奮，Crystal更笑言絕食上陣：“今次係我哋XiX第一次搞騷，所以大家都緊張到‘爆炸’，我最擔心到時啲衫會點、會唱咩歌等等。為咗保持完美聲線，依家開始要戒零食，務求到時以最佳狀態見大家。”另一成員Charlotte就話為咗呢次演唱會，搏命練習：“因為我擔心現場會緊張到腦海一片空白，所以要搏命練習，希望上到台所有嘢都可以順順利利，總之所有影響演唱會表現嘅因素，我都會超級小心準備。”Kiele表示唔敢放鬆，要寫稿度對白畀眾隊員：“因為佢哋成日亂講嘢，或者企咗喺度唔知講乜嘢，我真係懷疑當日會發生呢一啲情況，都係寫清楚對白畀大家，如果唔係真係控制唔到台上會發生咩事。”

Caitlin和Kiele都表示未開售已忙“撲飛”：“因為Backyard@AXA WONDERLAND係超級近距離嘅場地，加上我哋係組合，內部啲飛都唔夠，我哋問緊有冇方法買多啲，點知經理人叫我哋自己上網搶。”