鄧兆尊反擊網民

“伶王二代”鄧兆尊，自言去年患了大病，至今右手麻痺，已立遺囑。網民問候，家中三件“豬扒”，十五億家財如何處理……。

指食三件豬扒（三位女友），鄧兆尊可怒也，反問網民：“你身邊嗰件係咪豬扒？哈，可能豬扒都冇得食呢。唔通你老婆好似李嘉欣？人品又如何……。我唔知乜嘢係豬扒，我覺得身邊人品性純良；後生靚過，現在唔靚就飛人哋，我做唔出，自己都走晒樣啦，其他人冇資格去批評人。”

財產分配，“許多嘢都做晒”，兆尊坦言：“雖然，我唔會為結婚而結婚，跟我最耐的，都四十年啦。我冇諗過同佢哋散，佢哋都有保障嘅。”兆尊搞笑，“以我年紀，前面有阿叻、阿倫，佢哋好好呀，唔使緊張……。”

指有十五億身家，兆尊回應：“一億，我都未見過。（被標籤成功二世祖，可有女子投懷送抱？）近年收到過萬個DM，如果我真係用‘十五億’去呃人，呃乜都有，呢個市道，好多人都想搵個安定生活，試食，一夜情，可以食足幾年食唔完，而我唔做呢啲衰嘢。唔好意思，我米倉冇咁多米呀，未有能耐做佢哋心目中的許願樹……。”

“二十多歲時，以性行先……。”鄧兆尊成熟了：“今時今日，嚮往相處關係多過情慾關係，冇興趣做‘耕田佬’角色。坦白——每日在女友身上最多用個半鐘。但其他時間要對住個煩氣嘅人，有冇必要貼錢買難受先？玩貓仲開心啲。”

聰明靚女才可以加入娛樂圈，兆尊忠告——好多人爭入這個大染缸，好多人因應你性格控制你，針對：好色、貪名、貪利、貪毒、貪賭。“我唔貪，所以不受控制”。

高梁