陳瀅蔡潔周末來澳開騷

早前，陳瀅和蔡潔宣佈本月廿五日攪攪新意思，攜手參與由“本地舞台”及“澳門銀河”主辦的限定現場演出《Pillow Talk》後，還有數天她倆便會現身澳門銀河G Box，為大家盡show連日苦練出來的成果。日前二人到Band房彩排，陳瀅說：“此刻心情有點複雜、緊張、興奮和期待，真係感覺到個騷嚟喇，但又好似想再有多啲時間畀我排就更好！”蔡潔說很早便計劃在四月初要去瑞士，及後知道要做《Pillow Talk》，“當知道呢個消息時心情都好忐忑，應該點處理呢？搞唔搞得掂呢？好在所有嘢都處理好，先可以安心去呢個trip。”

陳瀅分享說去彩排前食物中毒，“因食物中毒差啲去唔到彩排，但一去到band 房，可能有live band 係現場影響，好快就即刻投入，有番少少精神咁練歌，我自己都好期待廿五號晚個show。”蔡潔很滿足說這是她人生中第一次正式夾live Band彩排，“今次隊band係上次我做山聰同一隊，嗰次大家認識咗，今日再見返呢隊band，同佢哋再夾歌都真係好開心，我知道佢哋都有同其他藝人同事做過show，所以都好放心，喺彩排室同阿瀅一齊夾band jam歌，感覺又唔同之前唱K，希望到時大家會滿意我哋嘅演出。”