VIVA與百三舞者快閃宣新歌

女團VIVA早前推出新歌《FOMO》，為宣傳新歌，日前拉大隊殺入利東街，更召集超過一百三十位舞者一齊快閃，整條街頓時變成巨型舞池。

整個表演以“一鏡到尾”拍攝，VIVA邊唱邊跳，分別跟近二十組舞者由街頭跳到街尾，最後集合過百人齊齊大跳《FOMO》。雖然拍攝時間於上午進行，但整條街的途人都看到不捨得走，不少人也跟着一起跳。雖然說是“快閃”，但其實“閃唔到”。

講到完成呢個瘋狂Project的感受，VIVA回想：“排練嗰陣已經覺得癲，冇諗過真係可以召集到咁多人一齊玩。”VALC激動話：“真係夢想成真！可以見到大家好努力跳同學呢首歌嘅編舞，真係好感動，每個隊伍為呢首歌增添咗自己嘅色彩。多謝大家投入時間同努力，同我哋一齊做到呢件事。”至於向來眼淺的Ada話見到大家一齊跳的時候，真係眼濕濕，“因為感受到香港跳舞社群嘅力量，雖然跳到身水身汗，但絕對值得。”最後，VIVA表示，如果反應好的話，快閃活動將會陸續有嚟。