陳嘉容外表冷漠錯失戀情

孫慧雪美食評判：有啲大鑊

《領廚爭霸戰》正播放得如火如荼，星級評審亦美女如雲，當中包括有名模陳嘉容(Eunice)及孫慧雪。一向對美食有要求的陳嘉容笑言節目請對了人；緊張大師孫慧雪則謂有啲大鑊。

陳嘉容笑言做美食評審，節目是請對了人：“我自己對煮嘢就冇乜興趣，但係對食物就好高要求，我淨係會食得精同埋好健康嘅食物，我做評判主要睇返佢嘅用料，烹飪技巧，味道，擺盤，整體呈現嘅賣相，仲有夠唔夠熱，即係溫度都係非常之重要。”

陳嘉容近年除了主力直播帶貨，亦有擔任形象及禮儀培訓的工作，工作滿滿的她，戀愛運就好像欠了些：“我個人外表我就比較冷漠，成座冰山咁！對呢樣嘢我又唔係好敏感，我比較Old School啲，我要對方不斷搵我，又不斷有表示，同我傾好多偈，但有時有啲人無端端約我食飯，我會以為係一啲普通朋友，如果唔得閒就會推，可能咁樣就錯失咗好多機會。而家我已經盡量降低要求，因為覺得世上冇完美嘅人，我對自己要求高，人哋都好辛苦，所以同我平起平坐就得。”

除了陳嘉容之外，靚媽孫慧雪亦是嘉賓評判之一，陳嘉容表明要求高，相反雪雪就表示完全沒有要求：“其實我好緊張，搵我做評判係有啲大鑊，因為我覺得咩都好好食。我啲朋友都話唔好信阿雪，佢咩都話好食，但係其實我應該係分辨到。”

對於緊張大師雪雪來講，近期又多了一個煩惱：“大仔就已經返學，八歲啦，完全唔使我擔心。但細仔就啱啱上N班，要自己一個人返學，冇爹哋媽咪喺身邊，所以都好擔心。之前做曬心理輔導，買曬啲繪本，全部都係關於開開心心上學去之類嘅內容。夜晚就幫佢孭曬書包，跟住我哋成家人就拍手讚佢好叻呀，返學啦！做足曬心理輔導。”