肥媽黑妹為門票頭痕

將於十二月十三日及十四日，在伊館舉行演唱會的肥媽（瑪莉亞）與黑妹（李麗霞），前日聯同表演嘉賓羅敏莊及黃劍文為演唱會彩排，肥媽透露表演嘉賓還有古淖文及譚輝智。

肥媽又透露屆時會三個鐘唱足三十多首歌，所以要刪減歌曲，感覺十分頭痕。黑妹笑言因為驚超時罰錢，但也沒辦法。

肥媽與黑妹現正為演唱會門票問題頭痕，肥媽說：“我自己細佬都冇飛，啱啱至向朋友回購十一張演唱會門票畀細佬，黑妹都要向朋友回購十四張門票去應付好友的要求。”說到他們可以加場解決“飛債”問題，肥媽說：“都冇地方，（加日場？）咁辛苦做咩，幾十歲，黐線，唔好玩殘自己，玩還玩，第日再玩啦。”黑妹笑說：“下一水我哋揸住拐仗唱。”肥媽又事先聲明，自己之前不在港，門票劃位的事宜都由黑妹負責，所以座位好與不好完全不關她事。黑妹說：“各位朋友啲座位唔好，千祈唔好嬲，事後我請大家飲茶。”

羅敏莊表示今次專程由泰國回港支持兩位阿媽（肥媽及契媽黑妹），又表示已融入泰國的生活，日常購物或到餐廳吃飯都可用泰文溝通，不過她謙稱目前仍是幼稚園階段。