冼靖峰大熱天穿皮褸現身

冼靖峰(Archie)與林君蓮（蓮姐）前日出席活動，除與現場觀眾玩遊戲外，又即場獻唱，吸引大批粉絲到場支持。

近日天氣持續三十多度，Archie穿上黑色皮褸現身，期間熱到用紙巾抹汗，司儀問他可要除掉外套，他都堅持唔除。事後Archie承認自己“愛靚唔愛命”，並笑説：“最緊要適合場合，知道今日活動喺室內有冷氣，不過初入行時試過着錯衫，以為個活動喺室外舉行，於是着咗大褸，（有冇熱到暈？）冇暈，頂得住，係熱少少。”Archie之前因為拍劇集《神耆小子》要着背心而開始健身，至今仍有保持，這兩、三個星期更食排毒餐配合，希望能操出八嚿腹肌。問到是否預備隨時騷肌，他笑說：“適當時候會騷，而家收緊水。”

同場的蓮姐繼續性感打扮示人，露出纖腰的她被指打扮性感，蓮姐反問：“好性感咩？之前我返咗加拿大，嗰邊啲女仔好開放，呢種打扮喺當地好普遍。”蓮姐稱對自己的身材都滿意。再問到之後會否多作性感打扮，她說：“我都想走女仔啲嘅風格，因以前大家可能覺得我比較男仔頭，所以現時每日都有做運動，希望令到線條更靚。”