自誇演啜嘴戲小兒科

周秀娜拍親熱戲激烈拗柴

前日，周秀娜、沈月、 林峯、容祖兒等人，亮相時裝品牌開幕活動。最近娜姐已完成拍攝電影《大分瓶》，不過稍後將要與AK一起補拍劇本寫好以外的感情戲。被問是否要加“咀嘴戲”，她笑說：“咀嘴好小嘢，最難拍的感情戲係點樣拍到兩個人之間鍾意對方。”

林峯在旁笑說：“親熱戲叫動作戲！”記者問娜姐拍了哪些“動作戲”，她笑說：“已經拍完，仲好激烈，我隻手拗晒柴，拍到周身酸痛，因為要打保齡球！” 林峯近期有電影《九龍城寨之圍城》成功的效應，帶摯他不停出席活動吸金不少，是否掘到了幾桶金？林峯笑說：“未有幾桶金，不過好多謝大家，亦好開心作品令大家鍾意留下深刻印象，自己因而多咗工作機會都好開心，有小朋友又照顧屋企，係一定要支持。”

《九》已收過一億一千萬，尚欠一千萬便打破黃子華《毒舌大狀》的票房紀錄，林峯表示不敢說是否有信心，已很開心大家會這麼支持香港電影，加上世界各地都有好反應，已覺得是超額超出預計了。周秀娜被問會否也想參與《九》片的演出，林峯代答：“佢好打得！”娜姐笑答：“可以參與演出死人都做到打得，動作可以去訓練，我之前都拍過動作片。”她表示有捧場看《九》片也很喜歡，感覺很有個人特色，之前她拍過鄭保瑞監製的電影，都希望合作一次對方執導的電影。

邱淑貞大女沈月出道一直擔任模特兒，她自覺很適應，因為自己素來對時裝感興趣。至於演戲方面，她表示暫時未考慮，雖然一直有不少導演和劇本邀請她演出，但都未打算接演。媽咪邱淑貞會代為篩選？她說：“屋企人都係睇我自己鍾意，會怕我辛苦，不過有好啱角色都唔排除會拍。”會覺得有媽咪的演戲細胞？沈月笑指都很少看媽咪的電影，因為從銀幕上看到媽咪演出，就會覺得是身邊的媽咪難以投入。

容祖兒穿上一套灰色新裝，焦點都落在衫上的Deep V設計。罕有性感示人的她笑說：“係幾低V，不過黐足膠紙好安全，我係膠紙王，全世界最好嘅膠紙我都試過，而且個V底下加啲嘢會破壞了件衫嘅設計，所以盡量做足安全措施不影響衫嘅美感。”她又笑言自己的形態夠平：“我仲係鍾意2D，唔好咁立體，時裝上會無咁分散可以集中啲！”