憶當年窮到你唔信

草蜢懷念成奎安仗義

由黎芷珊主持的《芷珊約您》，日前播出第三集嘉賓是男團草蜢，芷珊飛到台灣直擊他們的高雄巨蛋演唱會。三子完成高雄巨蛋演唱會後，與芷珊進行深度專訪。芷珊問他們現在快唔快樂，三子異口同聲說覺得快樂，坦言入行卅九年的旅程充滿Amazing。傑仔說：“諗返自己出道，十幾廿歲到依家，好幸運我哋幻想出嚟嘅嘢都成為現實，仲要做得幾好添，所以好感恩。”阿智則說：“我哋三個係屋邨仔之嘛，讀書仲係渣添啦，以前以為成功唔到口架喇，但依家係做到Famous喎，講緊去到邊度都有人識你喎，嗰時係幾難想像。”節目尾聲，草蜢三子應芷珊要求爆一個小秘密，三子大爆入行頭幾年都是表面風光，但其實非常窮困的時期。

傑仔說：“我哋開始出道攞咗新人獎，入行差唔多七年，之後都攞咗好多獎，喺出面其實都叫幾紅，但係我哋其實仍然係好窮，嗰時仲係住緊喺屋邨，搬出去之後，我哋嘅錢只係夠買三張床褥。嗰時成日同大傻成奎安一齊出去玩，玩完之後佢送我返屋企，佢係都要上嚟屋企坐，我話唔好啦，但佢死都唔肯，佢一打開門冇諗過我屋企係咁，就連一張櫈都冇，佢話冇櫈坐啫，畀杯水嚟飲吓都得啩，我話對唔住，我屋企連雪櫃、水煲都冇，當時我哋係窮到咁，嗰個年代表面係風光，內裏其實好慘，第二日大傻搵朋友送咗張梳化嚟畀我，係我屋企第一張嘅梳化。”傑仔憶起故人不禁哽咽：“好多謝大傻，雖然佢已經唔喺度，但我仍然好掛住呢個人。”