魏浚笙自戀新片造型

鄭裕玲狂串：未畀人嫌棄過？

昨日大年三十公映的賀歲片《飯戲攻心2》，日前在電影放映後舉行現場版《The Do Show》，由DoDo（鄭裕玲）與一眾演員及觀眾對談分享感受。DoDo同大家大談電影幕後花絮，現場氣氛融洽輕鬆，當中有不少爆笑時刻。 DoDo大讚張繼聰年紀逐漸成熟，殊不知愈大愈似木村拓哉， 引起全場歡呼，阿聰聽畢馬上截停DoDo：“千祈唔好咁講，麻煩剪走這段。”

問到新加入的Jeffrey（魏浚笙）事前有冇做足充分準備，面對DoDo提問，Jeffrey竟大膽簡單回應“有呀”，即時令她反問：“咁就答完(口+架)喇？你想死啊？”Jeffrey笑笑口補充：“當然有準備，但很享受自己污糟邋遢的造型，因為好爽，望到大家嫌棄自己個樣會好享受。”

轉數快的DoDo追問是不是很少見人對他面露嫌棄，二佬阿聰忍不住出聲：“好串啊你，我呢啲受咗成世。”DoDo直言：“轉個彎來讚自己靚仔。”眾人起哄即時令Jeffrey招架不住，自嘲並補鑊說：“我都覺得自己嘔心，不過的確係享受，多謝導演悉心安排。”

現場觀眾向演員提問，有心思細膩的觀眾發現戲中有不少鄭伊健的“影子”，導演陳詠燊回應：“香港男仔應該都對伊健哥哥有種情義結，因為佢係香港幾個流行文化的icon，如：《古惑仔》、《風雲》等。所以寫劇本時下意識提及幾次，揀歌時又碰巧揀中他的歌曲，令伊健哥哥的精神不停出現在我們戲中。”

DoDo又指：“有時睇阿聰IG post，睇到以為木村出po，原來係你嚟嘅。” 張繼聰笑言：“你呢啲係誅我唔係幫緊我，我呢次死梗。大家都係木村粉絲，唔好侮辱佢。”