失諸交臂下次再嚟

珠海本土粵菜，究竟係乜東東？一家名為盤谷的食肆，便打正招牌以此為賣點，並且贏得口碑無數。開業至今九個年頭，飲食界冰河時期三年疫情亦挺過，足見其實力。

盤谷餐廳設在一幢工廠大廈內，風格別樹一幟。粵菜中的燒味當然不缺，被譽為鎮店招牌菜嘅斗門荔枝木烤叉燒，用嘅並非梅頭，而係五花肉。用所謂秘製醬料醃製半日，以斗門蓮洲山頭荔枝木，三百度爐溫烤製，當然有其賣點。只是澳門人自小受冠男拖地叉燒薫陶，當然有五嶽歸來之器度。乜嘢風浪未見過？幸好此處瓣瓣有時瓣瓣掂，奄仔蟹燜雞砂鍋上，熱辣辣香噴噴就令人回味無窮；芝士海膽醬焗萬山對蝦，甜酸鹹拿捏恰好，將蝦嘅鮮爽帶上另一層次。至於來自台山嘅生蠔，以香葱蒜子砂鍋焗，上菜鍋蓋一開，香氣撲面而來，未食已起到先聲奪人之勢。另外古法鮮花椒蒸海斑，肯定係令人回味無窮、多扒兩啖飯嘅冶味菜。

值得一提，原來此處尚有36個月嘅鹵水獅頭鵝頭供應。但由於先前所點菜餚太多，當發現鹵水鵝頭時，已有失諸交臂之歎。但明乎人生就是欣喜與失落合奏的樂章下，才能譜出憧憬和希冀。所以今番未能一嘗其味，便是“下次一定咪錯過”嘅原動力。既然味蕾已有期待，人生又何憾之有？

·紫紋卿·