鄭裕玲唔想做阿姐

近日凌晨零時播映《男歡女愛》，TVB可能炫耀，幾十年來執到的寶，鄭裕玲是奇異一件——她不是TVB親生女，佳藝倒閉後，轉到友台求收的。艱苦備嘗，造就了藝人的奇葩——鄭裕玲明明是阿姐，她偏偏不願做阿姐，也怕別人視她為阿姐。

TVB越來越成熟了，早期藝員拍電影，要拉要鎖要雪藏，其實是電視台之光，也增加收佣。到鄭裕玲這一代，拍劇拍電影，雙管齊下，有鄭九組之稱，非常忙碌，非常勞累。友好勸她，為甚麼不請個司機。不！鄭裕玲已經是紅藝員：“我怕人以為我是阿姐！”

電視台是個藝術工廠，編導、藝員、道具，各有崗位，各司其職，很平等，都直呼其名。電視台照搬歐美模式管理，人際很西化。阿哥、阿姐的稱謂，緣自粵劇界，文武生必稱阿哥，花旦必稱阿姐。因為，周圍人都要跟他（她）搵食，有自己班底人馬。要“靠佢撈”！粵劇當紅阿姐，亦的確派頭十足。有司機、有私人跟班數名、有斟茶、有按摩、撥扇等等，各司其職。正所謂大老倌出台咁款，扮嘢扮到令人側目。

粵劇紅伶，也將“阿姐”風範帶入電影界，阿姐、阿哥之聲，由廠頭叫到廠尾。她鍾意就睬下你，唔鍾意就用鼻音應吓你，或者眼尾都唔望一下你。這種阿姐作風的確“非洲和尚”。Do姐就係唔想人誤會佢係呢種阿姐，所以，當時連司機都唔請。

阿姐前呼後擁排場，由粵劇轉入電影。導演都冇晒威嚴，要睇阿哥阿姐面色做人。時移世易，香港片場的“奇風異俗”已改變。地球是圓的，又輪到大量電視人殺入電影圈搵食。將電視台制度和做事作風帶到電影界……。

所有電視台都是工廠式分工，各有崗位，絕對唔會有人服侍你。你做你主角，我做我PA，一聲發仔埋位，便需言聽計從……。

話時話，粵語片當年有兩位阿姐很可愛……。梅綺，一入廠便無一漏網打招呼，由天橋燈光到掃地阿嬸。另一位白燕，一入廠便低頭疾走，任何人不招呼不點頭，都譽為“最好人事”。不過，有些舊時阿姐乞人憎到痺，恃紅生驕，隨時遲到五、六個鐘，此可忍孰不可忍了。

（無線人才濟濟 · 奇人異士多 · 五之四）

高 梁