李龍基最愛食蘿蔔糕

李龍基和太太Chris Wong日前與香港開電視主播馬梓軒一同拍攝賀年特輯。向來畫功了得的Chris，一展才華畫老虎賀虎年，基哥則為太太這幅畫作命名為“老虎發威妙筆生輝”。

Chris除了擅長畫動物，人像畫亦相當出色，但基哥坦言曾經質疑太太的畫功：“事緣有個朋友幫我畫一幅大油畫，但係我覺得有啲強差人意，於是Chris提議幫我畫一幅。但因為當時我未見識過她的畫功，所以唔相信。後來有日我放工返家，太太拎住幅畫問我靚唔靚？我話：你影印！後來知道真係佢畫，先發現佢咁有藝術天份。”

談及農曆新年的節目，基哥笑言：“就係拍拍拍拍同埋拍！唔係拍烏蠅啊，係拍戲呀！(留低Chris一個睇門口？) 唔係，佢好多時跟住我，幫我手整理妝容，都好忙！”基哥除了忙於工作，亦不忘品嘗賀年美食，他表示：“我最鍾意食蘿蔔糕！記得細個我爸爸開車運菜，好多時會拎蘿蔔返屋企。雖然成日食，但我食極都唔厭！好多人誤會食蘿蔔破氣，但大家見我有冇破氣？冇啊，我食好多！”