食得吓做雞花樣百出

新益肥老闆去年突發奇想，創製了一隻“食得吓”燒雞，肉質鹹香爽滑，配杯啤酒邊飲邊食邊吹水，實在人生一樂。據說去年在美食節單日賣出四百多隻、今年端午節單日賣五百多隻，做雞做到咁嘅地步，不能不寫個服字。 不過，既然號稱鬼馬奇廚，當然係成日諗住搞搞新意思。果不其然，月初再探“食得吓”，發覺多咗幾個新產品：非洲香辣雞、日行萬步雞、鹽焗妙齡鴿、梅子醬碌鴨。頭兩款是每日限量供應的，但限量版也不過比燒雞貴三二十元，想來可能街坊覺得除笨有精，轉捧新產品，做的唔夠賣，肥老闆被迫搞出個“限量版”？

話說“日行萬步雞”其實係用上田園生態散養的清遠雞，每日滿山頭搵嘢食，養至足四個月大，故此有日行萬步之說。這樣的雞以秘製藥材水、用白切雞方法浸製，雞皮與雞肉之間有層啫喱狀肉汁，所謂“食雞有雞味”，識食之人梗識揀。

非洲香辣雞不用說是借用了土生葡菜“非洲雞”的概念了，雞身以燒雞做底，以肥老闆的鬼馬，香辣醬汁配方當然又係與別不同，睇到鋪在上面厚厚一層金黃醬汁已經令人食指大動。

肥老闆話今年美食節要再接再厲，真係時候要去南灣湖畔探吓呢位聲稱“專心做雞”，但係又做到花樣百出的新益肥老闆啦。

穎 兒