馬浚偉樂見鍾嘉欣轉變

馬浚偉主持的《緣來自咖啡2》已到尾聲，今晚播出的壓軸一集，嘉賓是人見人愛的鍾嘉欣。

馬仔在圈中有三位特別疼錫的“妹妹”，鍾嘉欣就是其中一個：“陳法拉和楊怡從來不用我擔心，因為她們夠堅強、懂得照顧自己。但嘉欣之所以令我既疼愛又擔心，在於佢不太會保護自己，乜事都收收埋藏在心內，就算受到委屈、面對不公，都唔夠膽去為自己爭取、去拒絕他人。”

馬仔透露是在○四年認識嘉欣，睇住佢入行、長大，同佢有一份特別的緣份：“呢種緣份是親密的，不能解釋也不需要解釋。睇到佢經常受委屈唔出聲，若果我知道咗就會盡力幫助佢；但假如佢選擇沉默，我就唔係咁清楚了。我係潮州大哥，實在睇唔過眼人哋欺負我疼愛的人，一直鼓勵佢大膽講出來，使乜驚呢！”

兩兄妹難得碰頭，有講不盡的話題。馬仔欣喜地發現已為人妻為人母的嘉欣有很大轉變：“感覺開心了、容光煥發，各方面都是良好的；心靈上成熟了堅強了，懂得為自己努力爭取，既保護自己，更有責任保護丈夫、孩子、家庭。佢真係可以令我安心了，希望繼續努力，唔好浪費天父賜予她的才華，未來有更多好作品，兩兄妹能夠有更多不同渠道合作。”

嘉欣表示一直希望可以參與“阿哥”的節目拍攝：“因為真係太忙了，拍劇時間緊迫、婚後又多在外地，總是錯失支持阿哥的機會。作為一個妹妹，無論佢做乜都好，我一定親身支持。今天能夠同阿哥做節目傾偈，好開心，更非常感恩。”