郭富城學繪畫淨化情緒

郭富城日前接受TVB娛樂新聞台節目專訪，大談拍攝新戲《秘密訪客》的感受，他透露劇本好扎實，而且自己未演過類似角色：“係一個高冷、沉鬱的爸爸。”

談及近年城城拍攝的電影角色都比較沉重，他說：“以前會以玩賽車去釋放情緒，其實大家都唔知我在七、八年前開始鍾意油畫、水墨畫，亦有收藏畫作。因為疫情關係冇得去賽車，對畫畫的興趣就越來越濃厚。因為我較鍾意水墨畫，所以老師叫我由書法開始學習。我發現自己全神貫注去寫字時，原來可以淨化情緒。（學習到甚麼階段？） 都係初學者，唔叻！但我好喜歡呢類藝術。”

談到再次演爸爸角色，城城說：“電影有趣的地方，係我可以接觸一些從未演出過的人物性格，令我的人生中，似是曾經同角色生活過，但都係拍完就算。真正的爸爸角色就留返在屋企做，做一個‘順得人’爸爸。現實要做一個好爸爸，畀多啲愛、關懷、耐性、忍讓給小朋友，我仍然係學習當中。”