富貴門北區春日食堂

新年假期過後，大部分公司和職場人士都已恢復正常工作秩序，上班族例牌召集部門同事食個開年飯、搞搞聚會是常識吧！眼見黑沙環近明珠區食肆越開越多，要找一家坐得舒適兼價錢適合的，富貴門應是合適之選。

一點鐘到達後，見到樓下依然滿座，慶幸預早訂了房。廳房在二樓，有大細房，私隱度夠晒高；廳房午市不設最低消費，晚市就有細房兩千、大房三千之分，若有一圍檯人數，這個消費額絕對不高。

當日飲茶兼食午餐，人頭兩籠點心落單之外，又點咗幾樣招牌菜，包括冰菜沙律、牛板骨、鮑汁燴烏豆腐、上湯豆苗及滷水鵝等。雖然冰菜在超市亦有得賣，但仍是貴價菜，很少酒樓當例牌菜賣，這道冰菜沙律很受周邊來這裡食晏的OL歡迎。牛板骨經慢煮後起肉，厚切再燴汁上碟，只見擺在碟邊的牛板骨足有尺長；慢煮牛肉腍滑味濃，又有骨邊肉的爽甜，可謂食過返尋味。豆腐是用黑豆自家磨製，泡油後再燴汁，香軟嫩滑，單睇外形真係禾稈冚珍珠；據說還有即製木桶豆腐花，下次去食飯真係要試試。

當日埋單才千幾文，仲有幾樣菜食唔晒要打包走。如此價格，彷彿回到十年前。

穎 兒