上節目趁機闢謠情變

李佳芯被指另類

李佳芯、高海寧及張曦雯昨日為節目擔任嘉賓，李佳芯趁機為情變闢謠。麥玲玲大談玄學上的主角命，更指在座三位女嘉賓做主角並非易事，要經過一番努力；又指張曦雯牛年有機會結婚、生仔或者買樓。

李佳芯(Ali)、高海寧(Ling) 和張曦雯(Kelly)昨日為林盛斌與麥玲玲的節目擔任最新一集嘉賓。麥玲玲大談玄學上的“主角命”，指高Ling及Kelly屬於鼻高一族，容易吸引人注意，Ali則有桃花眼。Kelly就稱自己化唔同妝就會有唔同樣：“試過有三家銀行曾經用我做模特兒，行規上本來唔容許，但客戶都唔察覺。”Ali則自認“大眾臉”，是過目即忘那類人：“以前近視大眼鏡、鼻又扁，行過都唔知；升中學之後更好似隱形人一樣，無論學業成績、高度同朋友都唔起眼，人生冇乜機會做過主角。”

麥玲玲亦指牛年是Ali的變化年，工作上或與另一半的關係都有機會出現變化。Ali就問：“即是一係結婚一係分開？暫時兩樣都唔係，未有結又未係分！我反而期待事業上有突破，我有興趣搞生意。”但玲玲姐打斷Ali說話，直指她冇生意命，仲叫佢死心：“因為佢本身野心不大，是很穩定的人，不主動、不進取，連做藝人都相當另類。” Ali笑說：“你咁講，我真係唔應該入行？或者我係咪時候退休？”

高Ling入行多年，去年首次做主角。她指自己無論當女一還是二、三、四線都樂意去做，並一直謹記佘詩曼的話：“佢同我講過，唔好理角色係咩，你要畀心機做！唔係主角唔緊要，做好佢，那場戲你就係主角；甚至因為你做得好，可能蓋過主角光芒都唔定。”

高Ling入行初時以性感形象示人，她表示當時沒有想太多，有任何工作都照接，不過拍劇時有聽過難聽的說話：“有個導演同我講，你呢世都做唔到主角，真係幾大打擊！佢係純粹睇樣就咁講，不過我唔記得佢係邊個喇！”高Ling笑言初入行就被海量負面新聞打擊，更曾經患抑鬱症要睇精神科：“當時覺得點解要咁對我，喊過無數次，曾經長時間要食藥，但每次想放棄做呢行，都總會有工作搵上門。我最唔想屋企人擔心，試過有記者去我父母工作場合搵佢哋回應，佢哋又唔識應付、好驚，我真係好嬲。其實咁樣對藝人好大打擊，要付出更多努力才得到認同。”