一家餵牛迎牛年

陳柏宇執屋冀斷捨離

陳柏宇偕太太符曉薇及女兒陳羿辰，日前接受香港開電視主播馬梓軒訪問，並趁牛年的到來，一同到郊外餵牛，迎接農曆新年。

歌手陳柏宇(Jason) 日前偕太太符曉薇(Leanne)及囡囡陳羿辰(Abigail)到鄉郊遊玩，Abigail十分開心，牽住爸爸的手到處跑，見到牛牛時又驚又喜，要父母抱住才敢接近。Jason表示很享受每次帶女兒親親大自然，Leanne謂：“我哋好多時都想帶Abi出去戶外活動，又或者去主題樂園。可惜遇上疫情，樂園亦關閉，所以都好無奈。”

問到新年有甚麼節目？Jason表示與大部分家庭一樣，都會去親戚家中拜年：“通常會特別抽出一日向我屋企人拜年，以往係到酒樓團拜；然後可能再抽一日去Leanne屋企拜年。Abi 到的利市當然有幫佢儲起，已經幫佢開了個私人戶口，將利市錢會放晒入去。”

兩夫妻亦不忘分享新年願望。Jason鬼馬地表示：“希望新一年執乾淨間屋，做到斷捨離，哈哈！我哋屋企有齊各種各樣的醬料，然後我每隔幾個月就會望一望所有醬料，睇吓過咗期未，過期就會全部掉晒佢，然後再添置新的，所以屋企的醬料每過幾個月會換一次。仲有屋企的衣櫃呀，大部分都係Leanne的衫，買咁多衫回家，一年着得幾多次呢？”Leanne聞言即笑說：“所以我好驚Jason執屋！佢會問我要唔要，我梗係話要啦！”