金牛將至年味濃

冀望疫情一掃空

牛多貢獻暢閒話

就地過年一樂也

歲聿云暮，“鼠去牛來”，又快一年。

鼠年唔老嚟，抗疫足一年。猶憶去歲年卅晚，突傳首宗肺疫，導致人心惶惶，團年飯頓減氣氛，賀年節目要泡湯。

鼠年尾聲，北方爆疫，澳仍平安，市民毋須驚恐，只要戴好口罩，就地過年一樂也。

過新年，恭賀話語多。恭喜發財，身體健康，最易上口，禮多人不怪。

牛多好意頭，牛氣沖天、氣吞牛斗，比喻人時，顯夠氣魄；鍾愛炒股朋友，都希望牛市重臨，股價天天向上；就算逆市，拜託牛轉乾坤，牛運亨通。

形容人家了解事物透徹，做事得心應手，庖丁解牛四字概括晒。牛體格魁梧，耕田好力，為人類食糧作出貢獻。“吃的是草，擠的是奶”，當然講牛唔講羊，可用來讚揚“十年樹木，百年樹人”的學校或良師。

同文秦馬兄話最正氣係牛角掛書，比喻讀書勤奮，有晒典故。

體格強壯者，稱之力大如牛；牛體毛多，無論好醜，可喻多如牛毛，表示極多之意。

有些奇形怪事又關牛事，到海外或鄰地買樓，如無人幫手睇盤，等如隔山買牛，隨時坐艇。

初哥出來社會做事，份工麻麻哋，就話做住先啦，騎牛搵馬。形容人的資質差，領悟力低，便指“牛皮燈籠，點極唔明”。

做事話畀人老點，或做了老襯被搵笨，條氣唔順嘈生晒，就會畀人話“牛唔飲水點得牛頭低”。

牛的貶義亦有之，形容人暴躁，叫做牛精佬。牛頭唔答馬嘴，指答非所問，兩不相合。包拗頸，固執不變通，便鑽牛角尖。牛鬼蛇神最乞人憎，搞事搞非，唯恐天下不亂，甚或害人。

牛年新願望，冀疫情盡散，恢復旅遊，笑口常開！

羅倫斯