歐洲爆疫難起行

車評測試暫停頓

德國試車道路好

大多品牌高質素

歐洲勁爆疫情，打算歐遊的朋友，明年要乖乖留澳，最多只能到零星個案的內地散心矣。

最冇癮係鄰埠車評員，歐港齊爆疫，今年以來難出外試車，歐洲之行死火。鑑於往返要隔離，就算無設限也怕中招，看來明年上半年試車機會仍渺茫。朋友話，過往主要到歐洲及日本測試，較少到美加，每年起碼五六次赴歐，再加上飛日本，飛來飛去，飛行里數唔少，老早係機場候機大樓VIP常客。

歐洲品牌多，測試主力多是德國，平治、寶馬、奧普、福士、保時捷等，畢竟是財雄勢大、高質素的汽車王國，車廠或車商也要看市場如何才邀請試車。近十年八載，內地市場備受重視，多了內地車評人受邀試車。德國新推汽車多在本土測試，車正路靚。有時安排到其他歐洲國家，甚或由一國跨越到另一國，長途測試多個鐘到目的地。

飛歐洲測試新車有苦有樂，一般都安排坐商務位，近午夜起飛十餘個鐘，瞓下醒下，約三幾套戲到埗。不過識途老馬一上機謝絕餐飲，起飛後即搵周公矣。

遇上大牌子車廠，安排行程較寬鬆，抵達後安頓酒店，下午還有時間出外小遊，養精蓄銳翌日才試車。但有些安排時間緊迫，當抵埗後，落機腳踩浮雲時，機場附近已有新車恭候閣下測試。

有些行程僅四天，來回飛機唔見兩日，考精神體力，有時還要轉機走餐懵，行程適宜年輕人闖蕩，“老雀”多打退堂鼓。

在亞洲試車主要兩地方，一是日本，韓國居次。日本辦東京車展，廠方或車商會發邀請，睇完車展再試車，食得唔好。到日本試車多在自家擁有的試車場進行，走街道次之，行程較人性化，不會趕頭趕命。韓國主要往現代車廠蔚山大本營，澳韓來往更便捷！

羅倫斯