林子聰下廚享天倫樂

經常返內地拍戲的林子聰，今年因為疫情關係被迫留港，他笑言把握機會享受親子樂：“平時離家一走就係幾個月，呢次返來都好感恩，小朋友黐到我實。我發現自己未試過咁長時間陪住小朋友，每一日成長都有唔同！雖然唔捨得都要走，因為成頭家咁大支出，都要搵錢呀！”

苑瓊丹早前進軍飲食業，日前就邀林子聰出山拍宣傳片，肥仔聰就話因為疫情關係，留家鑽研煮飯，終成功發明“肥聰海鮮炒飯”：“苑仔話我咁肥，應該係伙食好的關係。小朋友唔可以返學，大家在屋企你眼望我眼，唯有煮飯仔啦，好在佢哋都捧場鍾意食，畀返啲面子。”

但阿聰就話唔敢孖苑仔一齊做生意，怕累街坊令對方蝕錢：“佢話夾埋我一齊投資，但都係唔好喇，我怕忍唔住自己食晒啲貨！苑仔係一個好好的前輩，因為佢時時刻刻都會照顧大家。有次到荒山野嶺拍戲，佢都可以請大家食到熱辣辣的燒雞，真係估佢唔到。”