Nowhere Boys懷念做實體騷

香港樂隊Nowhere Boys日前接受無線娛樂新聞台節目專訪，大談舉行實體演唱會及推出歌曲的感受。主音Van說：“太耐冇做實體騷，成年冇上過舞台唱歌，已開始唔記得台上的感覺。冇Live騷，我們的動力低晒，好頹！始終做網上音樂會冇現場觀眾畀反應係差啲，唱完一首歌靜晒會感到死氣沉沉、有啲空虛。”

談到新歌《最後的搖滾》，Van表示找了身邊工作人員包括經理人和化妝師，還有幾位兄弟及太太齊齊入錄音室錄和音，營造合唱團、歌劇感覺。成員Ken說：“錄音時發現唔見Nate，醒起佢中文唔好，而且本身歌詞都好深奧及密集，如果要佢練歌及教發音，相信需要好耐時間。”Nate笑說：“其實唔關事，就算歌詞好易，我都係唔識睇。”Van被主持人問到點解在台上經常唱爆褲時，他笑說：“經驗話我知，今次一定爆梗！因為五年爆咗六條褲，唯有打底打好啲。用魔術貼都冇用！之前以為條褲彈性好啲或者鬆身褲會冇事，點知都係爆，所以我已經放棄！其實減磅唔係為好睇同靚，係希望負荷細啲，跳起時冇咁辛苦、跑起來時亦冇咁傷，如果個人太重，會好快喘氣。”