乾燒海參懶人版

老周我就好鍾意食海參嘅，不過好多人認為煮海參係一件好麻煩嘅事，事實上都冇錯，又要乾、又要浸水、泡發、換水等等，係咪聽落都覺得好複雜好煩呢？所以就算係我呢一輩嘅朋友都少咗自己發海參，寧願慳返啲時間去行吓山、食吓好嘢好過。

不過呢排我發現市面上唔少海味店都有代客發海參呢個咁貼心嘅服務，又唔係加好多錢，十分方便，最緊要係慳返唔少時間。今次我就分享一個懶人版嘅“乾燒海參”做法，等大家喺屋企都可以輕輕鬆鬆“鋸”海參。

材料：發好嘅海參一磅、發好嘅冬菇六隻、京葱一條、薑片四片、上湯一碗、蠔油兩湯匙、老抽半湯匙、酒一湯匙、麻油兩湯匙、胡椒粉少許，同生粉一湯匙半。做法：將發好嘅海參切開四件，用薑同酒出水，備用。京葱切度，用油起鑊，放入事前發好嘅冬菇、葱、上湯，同生粉以外嘅調味料。湯滾起就可加入海參，慢水扣煮約十分鐘，最後用生粉打個芡，就可上碟。

周 中

（澳門美高梅金殿堂烹飪顧問）