漁人碼頭擺車展

戶外活動好地段

電動汽車趨成熟

配套設備須充足

疫情下，有多家車行在漁人碼頭舉辦小型車展，配合燈光夜市，風涼水冷，漁碼不失為戶外活動好地段。

車展天不造美，驟雨頻仍，周六有雨，幸周日天朗氣清，在大天幕下吸引眾多市民參觀，奧迪、寶馬、萬事得、現代、起亞、Mini、日產、鈴木及紅旗等品牌亮相。鑑於經濟環境欠佳，落鎚者不多，但做宣傳，有好過冇。

展出的有轎車、休閒車、七人車及SUV等，紅旗轎車設計漸趨時尚，車身流暢，惟未看到一汽國產版勞斯萊斯，即最高級之H9。

遇年輕人，發覺似漸鍾情電動車，事關設備新穎多嘢玩。在下駕駛過特斯拉Model X，的確幾新鮮。

此款SUV牛高馬大，車廂寬敞，六座配備，可選七座，夠晒寧靜，不過須摸一輪設備才有個底。駕駛席左前方中控台，則有個大型螢幕，仿似大電腦放在眼前，除泊車睇得準外，行車時更可清晰看到後方路面情況。總之對住個MON，功能、自動化多不勝數，一時間唔記得咁多。

後座兩邊車門鷗翼夠搶鏡，乘客宜待兩翼升盡才可上車，若盲頭烏蠅企近等開門，或會被車門升起刮到。不過車身裝有距離感應器，鷗翼可自動根據兩側距離調節，毋用怕在停車場碰到兩邊泊車。泊某些低矮停車場，就要留意鷗翼升盡會否碰到頂。

鷗翼頗有台型，但最怕Hang咗或被撞到車身，畢竟維修費太貴。

Model X續航力強，充頂級電量，澳門細可走多天，而且好力水，加速得心應手，減速立竿見影。

電動車漸趨成熟，未來將大行其道。現時澳門充電配套還可應付，將來電動車普及使用，充電配套必須足夠！

羅倫斯