業主停租車主煩

通街搵位倍艱難

疫下樓價仍未降

中產換樓也徬徨

街坊近期搵車位，網上、報紙廣告睇勻未落鎚，一是價錢不合理，二是車位離家較遠，總希望搵回自住大廈車位，出入方便些。

街坊兩架車得一個私家位，另一租了十多年，業主最近取回車位，指兒子上大學考了車牌，需要駕車返學，街坊想主動加價也不得要領，現時只好停泊公共停車場。

住中區，一向車位租金較貴，常見有較靚房車夜間泊街頭，大抵知車主住在附近，本身無私人車位矣。一般而言，中區煞食地段車位租金都需三千尾至四千，大車位叫價四千五。一塊百尺車位，無需裝修、打掃如此貴，等於上世紀供樓價錢，是否值得，見仁見智。

建築商最走精腳，除舖位永遠不賣放租外，近年連車位亦收收埋，吊起來賣，大多放租，保證同舖位一樣，月月有生水入。年前曾有個時期，中區住宅車位瘋狂叫價三百萬，究竟有無人買，天曉得，現時已回落。

氹仔買車位平過澳門半島，很易租，難叫價，皆因多屬高層大廈，已配備足夠車位。故而住得氹仔，大多住戶有車位，擁有多輛的，租亦不肉痛。由於戶戶有車，形成氹仔經常塞車，特別是幾個圓形地周邊，擠塞最甚。居民若駕車出街購物，氹仔街位經常泊滿，迫住要泊中央公園停車場，現時興建空中走廊，更無位泊，隨意泊街頭一角，即主動申請牛肉乾。

買車位難，買樓更難。友儕突見家中天花樓層有水印，曾滴水，肯定有滲漏，諗住樓換樓。某日由熟人帶往睇新樓，兩房、三房睇晒，認為地頭頗好，但一睇樓價，兩房七百萬，三房近千七萬，賣了三房舊樓還要補大筆，慨嘆超中產都要打退堂鼓。

羅倫斯