鍋貼大明蝦

“鍋貼大明蝦”係香港一間舊式酒樓嘅經典點心之一，年輕一輩嘅讀者可能未聽過，實情佢就係造型好似鍋貼嘅蝦多士，咁應該有聽過啦？不過同平時食開嘅蝦多士唔同，鍋貼大明蝦唔係用蝦膠，而係用原隻大蝦釀入方包。油炸嘅“鍋貼大明蝦”十分脆口，但唔怕油膩，啖啖彈牙嘅鮮蝦配上金黃酥脆嘅多士外皮，真係食過返尋味！呢道中西合璧嘅懷舊菜式做法簡單，大人細路都鍾意食，無論係畀小朋友做午後點心，抑或攞嚟佐下啤酒，都係相當適合嘅。

材料有：大蝦十隻、白方包半磅、生粉半磅、蛋白兩隻、鹽和芫荽少許。做法：先將大蝦洗淨，去殼同摘去頭部，再喺蝦背鎅一刀將蝦身開邊，逐一用刀拍扁，備用；方包去邊皮切成骨排狀小片。將生粉、蛋白同鹽混成蛋漿，然後將處理好嘅蝦逐一蘸上蛋漿，蝦身外皮朝下放喺白麵包上面，再喺面頭鋪一小片芫荽，就可準備落鑊油炸。油滾起後轉中火，炸至金黃色就可撈起上碟。

周 中

（澳門美高梅金殿堂烹飪顧問）