報捷來走勢漸上力

昨周五晨課，有較多馬匹快試操練，個別馬表現有水準。現選擇數駒評述。

“浩勝盈輝”由何華麟出試一段。時間不快，走勢有勁，態況已勇。去季曾勝出三場頭馬及一場第二。收季前一仗沙地經典盃被捧城大熱門，惜中段受阻，再追只爭得亞軍。此駒擅跑沙地，唞暑後連續四朝皆見出操。料新馬季將會有不錯表現。

“寶寶”由余健雄出試一段。按韁而馳，走勢上勁上力，神態生猛。此駒去季取得兩勝兩亞及兩季，不算太好，亦非太差。暑期後復課，操練甚勁。此駒沙地較合走勢，故新馬季再出爭沙地賽事，值得留意。

“夏雨”由何華麟出試兩段。扣韁而馳，走勢輕鬆自然，神態生猛，勇態又起。去季尾連番爭得第二及第三。而此駒去季未曾勝出過頭馬，只爭得三場第二及三場第三，暑期後復課加強操練，希望新馬季會有頭馬勝出，不妨盯緊。

“滿貫藍寶”由何華麟出試兩段。按韁而馳，愈走愈快，輕易跑畢全程，走來步闊身輕，神態生猛。此駒質仍新，只出過四次賽，已取得一勝一次第三。去季最後一仗跑沙地短途，惜走勢仍欠成熟，未能勝出。之後連休個多月，八月復操，加強操練後走勢漸見成熟。相信今季復出，會有理想表現，值得留意。

“報捷來”由田中正一快跳兩段。全程緊按，走來昂首闊步，毛色馬身靚，態況已勇。此駒去季九次上陣，未有頭馬勝出，只爭得兩次第三。收季前一仗草地千二米，由於前段搶口，較入最後直路時又有外閃傾向，修正走勢後再追得第三。唞暑後經休養生息，復課走勢漸上力。料季初上陣，有力一爭。