新派酒糟雞

近呢幾個月，老周我獲邀主持一個網上烹飪節目，疫情之下都可以同網上觀眾交流廚藝，仲有唔少明星同靚女嘉賓上嚟節目作客，相當過癮。其中一集就有嘉賓上嚟分享一個創新菜式，名為“新派酒糟雞”。雖然叫酒糟雞，但佢呢個做法同一般傳統嘅做法好唔同；新派做法用咗日本麵豉同沙律醬，仲要係焗雞，聽落好似有啲九唔搭八，但我親身試食過，風味一流，又十分容易整，所以今期就同大家分享下呢個新“煮”意。

材料有：光雞一隻、酒糟一碗、日本白麵豉（即味噌）半碗、沙律醬四分之一碗同埋檸檬一個。做法：先將雞隻去頭，背部用刀鎅開，備用；將所有調味撈埋一齊，擦上雞嘅外皮同雞肉內側，用保鮮袋包好，放入雪櫃醃一晚。第二日，焗爐預熱至二百度，焗約廿五分鐘至外皮轉金黃色，就可以出爐，最後喺表面唧返啲檸檬汁，切件就可以上碟。

周 中（澳門美高梅金殿堂烹飪顧問）