釀節瓜環

相信大家夏天喺屋企煮飯，都會食唔少瓜菜，節瓜、冬瓜呢啲就一定唔少得。節瓜成身都長滿細毛，所以又名毛瓜，具清熱、清暑、解毒、利尿、消腫等功效，低卡之餘又有營養，炎炎夏日食就最啱，煲湯或蒸煮樣樣得，所以今期老周我就同大家整釀節瓜環呢一道家常菜。提吓大家，選購節瓜時，要揀啲瓜身多毛、有光澤感，頭尾粗幼都要夠均勻，蒂部唔怕變黑，先算係新鮮嘅靚貨。

材料有：節瓜兩條、脢頭肉五両、蝦米五錢、冬菇數件、鹽半茶匙、蠔油兩茶匙、上湯半碗，另外醃肉、瓜環沾粉同打芡各需用到一湯匙生粉，總共要三湯匙。

做法：蝦米同冬菇先浸水，切細粒；豬肉切成薄片，然後切粒剁碎，加埋蝦米同冬菇一齊剁，剁成肉餅狀後再加入鹽同生粉調味，備用。節瓜去皮，切成約厚兩厘米嘅厚片，清除瓜瓤後，釀肉之前一定要喺瓜環內側塗上適量生粉，咁先唔怕煮煮下餡料同瓜環分離。逐一釀入豬肉碎後，落鑊煎香節瓜嘅兩邊，加入上湯同蠔油煮至節瓜腍身，最後用生粉打個芡即成。

周 中（澳門美高梅金殿堂烹飪顧問）