國際車壇續響鑼

足球聯賽告煞科

歐冠盃賽有瞄頭

誰是英雄拚個夠

車壇開鑼數周，又到球壇煞科時。茶檔車迷轉談波經，賽後論英雄。

講英超，大家認同利物浦最強，演出穩定，侵略性強，迫到對手有氣冇碇唞。有紅軍出場，多無悶場，係在下喜歡球隊之一。

西甲方面，一向係巴塞擁躉，但擁還擁，這支勁旅已非昔日有沙維、恩尼斯達或MSN在陣的巴塞，隨着球員年紀漸大，谷極唔起，統治中場優勢漸失，水銀瀉地的攻勢一去不復返。復賽後在酷熱天氣下密集出賽，更顯有心無力。反之皇馬活力十足，搶走聯賽冠軍非常合理。弱勢教練長期以美斯為核心，老打法被對手睇死。新加盟球員不敢獨闖龍潭，攻勢多在外圍，悶極！整隊前中後都必須補強，否則每況愈下。

傳巴塞會引入祖記的中場比真歷及國米鋒將馬天尼斯，前者老化難硬拼；後者未夠火候，對巴塞幫助不大。

德甲幾乎睇足全季，拜仁慘敗法蘭克福後炒靚仔教練，助手上場後，球隊有起色，多蒙特等難敵老對手。今屆萊比錫續顯功架，幾硬淨。

意甲睇唔少場次，有C朗在陣的祖雲達斯再攞冠軍，惟整隊仍覺遲暮，老婦人之名難擺脫，缺乏供應C朗，否則入球不只此。國米加入一些較有質素球員，實力增強，但老將仍多，活力不足。反觀阿特蘭大打法進取，與今屆成績一般的拿坡里相似，打進攻足球贏得可觀性。

歐冠十六強決鬥，利物浦、拜仁、皇馬、聖日門、曼城、巴塞、祖記最強，有機會過頭關，只是皇馬對曼城，兩個只能活一個，好慘。多蒙特、馬體會等次強隊伍若遇最勁對手，料凶多吉少。

歐冠將掀高潮，令半年來飽受疫情困擾的球迷送上一份安慰獎。

羅倫斯