夜香花炒蝦仁

夜香花又稱夜來香，佢有清肝明目嘅功效，係夏天當造嘅蔬菜。相信好多人都未食過佢，事關佢花期唔太長，通常每年五月到八月先至會見到佢嘅蹤影，平時街市又好少有得賣。

最常見嘅夜香花食法就係冬瓜盅，亦有唔少大牌檔或餐廳會攞嚟做小炒，同魚肉、鮮蝦等海鮮一齊炒，增添一絲清香怡人嘅味道。今期老周我就同大家分享一道簡單嘅“夜香花炒蝦仁”，趁宜家盛夏時節，把握品嘗淡雅清甜嘅夜香花嘅機會。

材料：蝦仁四両、竹筍二両、青椒同紅椒共一両、夜香花五錢、鹽半茶匙、生粉一匙半、胡椒粉、蒜薑葱油同酒各少許。做法：將蝦仁去腸洗淨後抺乾水，用鹽、生粉同油醃好；青、紅椒切角形，竹筍切粒備用。先將蝦仁灼熟，起油鑊後落薑、葱、蒜、竹筍同青紅椒爆炒，再落蝦仁炒至微微熟，落埋夜香花輕輕炒一炒，最後灒油同打芡，即可上碟。

周 中

（澳門美高梅金殿堂烹飪顧問）