冬瓜盅

天時暑熱，講到消暑聖品，第一時間就諗起冬瓜，冬瓜湯更加係大家夏天必飲嘅湯水。

呢排出酒樓食飯，我見唔少人都會叫冬瓜盅，因為大家都嫌喺屋企整冬瓜盅比較麻煩，所以出街先會叫嚟食。不過今期老周我想話畀大家知，自家製冬瓜盅亦唔係想像中咁複雜，材料又十分之實惠，只要屋企有個裝到冬瓜、大小相宜嘅容器，已經事成一半。

材料有：一個重約四斤嘅冬瓜、雞肉片二十克、火腿片二十克、冬菇二十克、蝦仁二十克、上湯四碗、陳皮一小片及鮮蓮子四十克。做法：先將冬菇同陳皮稍稍浸泡；冬瓜洗淨，切走頂部同少許尾部，令個瓜喺煲裡面企得穏，另外可喺冬瓜周邊用小刀切成鋸齒花邊。之後挖走瓜囊，裡面嘅瓜肉就挖出嚟切粒備用。將其餘所有材料出水，同喺冬瓜盅內壁搽少許鹽，攞去蒸約五分鐘，令瓜身入味。將上湯倒入冬瓜盅，落埋瓜肉同其餘嘅材料入湯，蒸約半個鐘，筷子可輕易拮入煲淋咗嘅瓜肉，就代表完成，加返適量嘅鹽調味即可享用。

周 中 （澳門美高梅金殿堂烹飪顧問）