荔枝炒魚球

又到咗一年之中荔枝當造嘅時候，聽人講今年仲要係荔枝大豐收，周圍都有平價荔枝賣。夏日炎炎，安坐家中涼住冷氣，食住又冰涼、又清甜嘅荔枝就最享受，不過俗語都有話“一粒荔枝三把火”，體質燥熱嘅朋友就少食為妙；仲有，荔枝甜份較高，血糖偏高、糖尿病患者、或者減緊肥嘅朋友都要睇住份量，咪食得咁放肆呀。

老周我知道，有時大家會貪平一次過買大堆荔枝返嚟，但一下又唔食得多，食唔切變壞咗會好浪費。不如用嚟炒吓菜，果菜一齊食，十分開胃。今次就同大家分享下呢味“荔枝炒魚球”。材料有：桂魚肉六両、荔枝肉四両、彩椒二両、薑、葱同蒜各少許、生粉半湯匙、鹽半茶匙、胡椒粉少許、酒少許、蛋白一隻。做法：先將魚肉切成骨牌形做魚球，用鹽、蛋白同生粉醃一下；彩椒切角形，備用。魚球用溫油泡熟後先放埋一邊，之後將鑊裡面嘅油隔走，彩椒同其他調味料落埋鑊炒，再落埋魚球、荔枝肉炒多兩炒，最後用生粉打個芡同贊酒，就大功告成啦。

（澳門美高梅金殿堂烹飪顧問）

周 中