五月粽

龍船鼓響，好快就到農曆五月初五端陽佳節。以前舊傳統家家戶戶都會老早包定粽，總係覺得自己包粽先似過節，仲會包多啲送畀親朋戚友，幾咁溫馨。但今時今日，多數人都已經唔識包粽，又或者嫌麻煩。話說老周我都好多年無收過朋友自家包嘅粽啦。

雖然家吓周圍都有粽賣，由傳統鹹肉粽到新式啲嘅水晶粽任君選擇，你諗得到嘅都買到，之但係當年食到嘅手工味道，現在就唔係度度都搵到啦！如果大家有時間，今年不妨試吓同屋企人動手一齊包吓粽，過個溫馨嘅節日。

各位都市大忙人要喺市面上搵到手工粽，我哋酒店都係一個唔錯嘅選擇，全人手製作，真材實料，包你食得返嗰種人情味。我早排已經率先試咗一系列嘅出品，當中嘅“特級鮑魚瑤柱響螺裹蒸粽”就最得我歡心，用料傳統上乘，滋補又矜貴。如果想食得健康啲，可以選擇“五豆野菌有機糯米藜麥粽”，用有機藜麥混入糯米，又用雲南特產羊肚菌同牛肝菌取代肥肉，比傳統裹蒸粽健怡得多，夏天熱辣辣食完都唔覺膩。

由於啲粽係逐隻逐隻人手包，數量有限，想試嘅最好提早訂啦！

（澳門美高梅金殿堂烹飪顧問）

周 中