黃魚羹

黃魚又稱石首魚，因為喺佢哋後腦位置有粒魚石而得名。黃魚春天當造，全國各地都食到，無論係南方同北方嘅菜系經常都會用到黃魚做菜。喺我哋南方，五月嘅黃魚貨色就最靚，鮮甜味美，相信讀者當中都有唔少黃魚嘅捧場客。黃魚肉質非常細緻柔嫩，骨刺又較少，老周我就鍾意用嚟做湯羹，鮮味同營養都一百分。今期就分享下我平時嘅魚羹做法，簡單快捷又美味，趁今個月黃魚當造可嘗試。

材料有：黃魚約十両，豆腐一件，竹筍一両，鮮菇五錢，清湯四碗，薑、葱、酒、麻油同胡椒粉少許，及生粉三湯匙。做法：先將豆腐切粒，竹筍同鮮菇切成細片，薑同葱分別切成細絲，備用；黃魚蒸熟後去頭同骨，將魚肉拆成小塊。清湯煮滾後放入所有材料，生粉另外加清水拌好，打個芡，等個湯滾幾分鐘後就可以慢慢倒落去打芡，攪拌好就食得。飲嘅時候可適當地加少少葱花係面頭，亦可撒多啲胡椒粉、淋多少少麻油，咁就更加冶味。

周 中（澳門美高梅金殿堂烹飪顧問）