香蕉番薯餅

前幾日有位寫字樓嘅靚媽同我呻，話佢個仔每次食飯都坐唔定，唔肯食嘢，個人瘦蜢蜢咁，搞到鬼死咁頭痕，問老周我有乜嘢開胃得嚟又吸引嘅菜式，令個仔重拾對食飯嘅興趣。我就介紹佢整一道香蕉番薯餅畀仔仔做下午茶點心，甜甜哋又口感煙韌，細路仔一定鍾意食。加上番薯同香蕉又健康、又飽肚，可以補充返正餐吸收唔夠嘅營養。

材料有：番薯半斤、香蕉一條、糯米粉四湯匙、生粉一湯匙、砂糖兩茶匙、芝麻少許。做法：先將番薯洗淨，蒸熟去皮，再壓成番薯茸；香蕉去皮切粒，備用。將糖、糯米粉同生粉混入番薯茸搓均，分成幾個細嘅粉團，將香蕉逐粒包好，壓平成餅再撒上芝麻，落油炸至金黃色即可。上碟前記得用廚房紙吸一吸表面嘅油，就唔怕咁肥膩啦。提提大家，可以揀返啲顏色鮮艷嘅番薯吸引細路，如最近好興嘅紫薯；另外，如果番薯甜度較高，可酌量落少啲糖。

睇見靚媽為咗個仔咁勞心勞力，感嘆做人媽媽真係唔容易，所以大家嚟緊下禮拜日嘅母親節，記得好好孝順吓家母啦！

（澳門美高梅金殿堂烹飪顧問）

周 中