余潔瀅演妹妹太可愛

趙慧珊又愛又恨

女子組合Super Girls隊長趙慧珊(Aka)主演的微電影《最好的禮物》，昨日在網上正式推出。Aka更與同公司的余潔瀅(Zoe)首次合作，在片中飾演充滿妒忌怨恨的兩姊妹。

繼早前推出新歌《到底之後》後，Aka主演的微電影《最好的禮物》，昨日在網上正式推出。Aka表示拍攝時，心情長期處於低落和波動，充滿挑戰性。她說︰“感謝導演搵我拍，之前我曾經主動搵佢幫我拍MV，現在佢搵番我拍，係好大挑戰。”

Zoe在片中演出Aka的妹妹，Aka透露戲中受到妹妹多次傷害︰“故事係講妹妹出於妒忌，多次傷害我同欺負我，令我好心痛同傷心。”兩人因拍戲而變得熟絡，Aka大讚這個妹妹好得意︰“我成日諗要唔要將現實中我的妹妹代入片中，但當見到佢，就好鍾意佢，好快投入，當佢係我妹妹咁。”現實中與妹妹感情要好的Aka，直言靠朋友分享的經歷去代入。她說︰“現實中我同妹妹感情好好，不過身邊朋友同屋企兄弟姊妹關係未必咁好，有聽過這種經歷，所以好快代入角色。”她又謂因為太入戲，以致曾經發惡夢︰“試過發夢見到妹妹要離開我，我第一次喊到收唔到聲，起身仲喊緊。我打畀妹妹，話我發夢佢要離開我，佢反應係覺得我好甜入心，不過當時真係好驚。”

Zoe則透露與Aka在樹林拍攝“攤牌”一幕戲份後就病倒，她說︰“當時係凌晨時分，而且好凍，又着高跟鞋，山路唔平，結果最後有少少傷風，導演都病倒。”現實中她有否曾與家姐余香凝鬧得不快，甚至出現妒忌怨恨？Zoe表示︰“大家實有鬧交，但好快冇事，因為佢始終為我好，唔會做傷害我的事，所以唔會好似電影戲份咁。而且大家由細到大一齊生活，有一排唔見都會掛住對方，會覺得冇人同我傾心事，我應該做唔到戲裡面咁狠心。”